Varm drikke på termos kan vera god fyrstehjelp om nokon er på veg «i kjellaren» eller held på å frysa i hel. Men fyrst og fremst knyter me termosen til tur-kos. Og kos på tur er viktig!
Her skal du få nokre gode tips på kva du kan byta ut tam te og sur kaffi med.
Varm eplemost med kanel
Høyres avansert ut, men er ikkje det. Kjøp eplemost hjå ein lokal forhandlar eller gå på ein økobutikk i by´n. Den beste er ikkje silt,og ser «uklar» ut. Ha passeleg mengde i ein kjele og tilsett ei kanelstang. La dette trekka så lenge du har tid til, 10 minutt er nok, men det skal ikkje koka.
Om du vil gjera det litt avansert kan du ha i heile kardemommekapslar, ilag med kanelstanga. Nydeleg smak!
Eplemost
Kanelstang
Eventuelt heile kardemommekapslar
Solbærtoddy med ingefær
Denne varianten er enkel, men utruleg god!
Lerums solbærsirup
Fersk ingefær (2 skiver à 2 mm på 1 liter drikke)
Kokande vatn
Ha i ein firedel med Lerums solbærsirup på termosen, tilset kokande vatn, og ha tilslutt i to skiver med fersk ingefær. Skivene med ingefær skal berre ligga oppi og godgjera seg medan du baskar i snøen.
Ingefæren gir ein skarp og fin smak på solbærtoddyen, i tillegg til at ingefæren er kjend for å ha lenkjande effekt både på kvalme og forkjøling. Om du skal ut i mange kuldegrader, kan det vera lurt å varma sirupen opp i lag med vatnet slik at alt er kokande når du heller det på termosen.
Kakao med luksus i
Luksuskakao dreg du opp av sekken når mistemann har gått laaangt og treng ekte «bensin» på motoren, eller du vil imponera turfølget.
1 liter mjølk (H-mjølk er best)
100 g kokesjokolade
Ei halv teskei vaniljesukker
Nok marshmallows!
Ha litt mjølk i ein kjele, i lag med ei plate kokesjokolade (lys eller mørk alt etter kva du likar best, mjølkesjokolade går òg fint), og smelt sjokoladen medan du rører rundt. Ha i resten av mjølka, 1 liter mjølk er passeleg til ei 100 g sjokoladeplate.
Ei halv teskei vaniljesukker gir god smak. Ha kakaoen på termosen. I ein liten pose tek du nokre marshmallows(amerikansk sukkersnop), som du får kjøpt på bui. Når du kjem fram tek du to slike mini-rundballar, legg dei i koppen og heller kakaoen over. Sukkersnopet vil då løysa seg litt opp og bli som skum på toppen. Luksus!!
Sigrid Henjum sitt heksebrygg
Heksebrygg lagar du når kompisen seier han er litt forkjøla og ikkje kan bli med på skitur.
Då seier du at det kan han, for du har laga noko han blir frisk av!
Det smakar godt, og viss ein trur nok på det, vert ein frisk av heksebrygget.
Eg har vanlegvis oppi på slump, men her skal du få ei slags oppskrift:
1 liter vatn
½ sitron
1 ss honning
½ fersk chilli
2 skiver fersk ingefær
Om den sjuke er litt kresen kan du vera grei og ha oppi litt solbærsirup, litt eplemost eller litt heimelaga saft om du har.
Kok opp vatnet, ha oppi alle ingrediensane og la dei trekka i vatnet som nesten skal koka. Skjer av to sitronskiver og ha i. Skvis resten av sitronsafta opp i brygget. Trekk i minst 15 minutt, sil av, fyll i termosen og server med god tru.
Turekspertens tips
• Vask termosen godt, gammal kaffi-smak er ikkje digg. Maskinoppvaskmiddel er tingen, hugs å skylle godt.
• Hald termosen opp ned, rist godt og ver sikker på at han ikkje lek. Elles vert det krise i sekken!
• På ekte kalde turar kan det vera lurt å legga termosen inni dunjakka i sekken for å halda ekstra på varmen (då må du vera heilt sikker på at han ikkje lek!).
• Er du usikker på om termosen din er god? Fyll han med kokande vatn, skru godt att, set han i frysen over natta, og sjekk neste morgon. Er det framleis lunk er det godkjent. Er vatnet iskaldt – kjøp deg ein ny.
Sigrid Henjum
Sigrid er UTEs populære turmatekspert. Vi får stadig tilbakemeldinger fra lesere som har hatt suksess med oppskriftene hennes. Særlig er bjørnebrødet blitt en klassiker. Sigrid bor i Sogndal og er lommekjent i Sogn, men hun har også vært på turer til Grønland, Svalbard og Lofoten. Sigrid er utdannet sykepleier, og driver Sogndal Lodge & Guiding. Hun er proppfull av energi, initiativ og guts, og du kan fort møte henne på en isbre, sjonglerende på en hest eller i en kajakk i Sognefjorden.
