Potetsuppa kan lagast heime og takast med ut på termos
Lagar du den heime, kan du bruka stavmiksar for å få suppa glatt. Elles er trikset å koke i hjel potetene til graut, så vert det berre små klumpar. Ute på tur vert suppa like god sjølv om det vert meir klumpar.
Det finst faktisk stavmiksar på batteri om du vil ute-kokkelere med fancy utstyr. Suppa serverast med sprøsteikt bacon, pølse eller spekemat. I sesong kan du pynte med gaukesyre. Både blad og blomster på gaukesyre er etande og den er rik på C-vitamin.
Potetsuppe
til 4 personar
1 lauk
1/3 purrelauk
1 fedd kvitlauk
1 ss smør eller olje
650 g poteter (Kerrs Pink, Troll og Mandelpotet høver seg godt)
1 liter vatn
2 hønsebuljongterningar
1 ss Crème Fraîche
Salt
Pepar
200 g bacon, pølse eller spekemat, gjerne sprøsteikt
Ein stor neve gaukesyre (sjølv om gaukesyra er frisk og god, skal ein ikkje eta store mengder. Ho inneheld ei syre som kan vera hard mot nyrene om du et for mykje. Ein neve med gaukesyre tåler du godt).
Framgangsmåte
Del potetene opp i småbiter før du kokar dei, så vert dei fortare ferdige. Kok dei heilt til dei går i oppløysing og hell av mesteparten av vatnet. Noko vatn kan vera att.
Lauk, kvitlauk og purre i små bitar fresast saman med smør eller olje i ein stor kjele. Når lauken er vorte blank, tilset du dei kokte potetene saman med buljong og vatn. Mos med det du har med deg ut av utstyr, potetstappar, visp eller gaffel. Tilset ei skei med Crème Fraîche og smak til med salt og pepar.
Legg sprøsteikt bacon i midten, pynt med gaukesyra og gjerne god olivenolje. Trøffelolje, sitronolje eller kvitlauksolje passar godt.
Kos deg!
Sigrid Henjum er fast turmatspaltist på utemagasinet.no. Fleire oppskrifter.
