Snøen lavar ned og det er rundt null grader ute, men det er ingen grunn til å springa heim for å eta middag.
Lukta av spisskummen, kvitlauk og chili blandar seg mellom snøfiller, og fortel at her ute i snøen ventar eksotisk middag som varmar innvending.
Linsesuppe
Til 4 personar
300 g raude linser
3 gulrøter
1 lauk
3 fedd kvitlauk
1 fersk chili eller 1/2 ts pulver
1 fersk ingefær på storleik med ein golfball
1 ts heil spisskummen
1/2 ts malt spisskummen
olje til å steika i
Ca, 1 liter vatn
salt, pepar og eventuelt meir chili
Dette gjer du heime
Kutt opp gulrøtter og lauk i små bitar. Ha i ein liten boks eller brødpose.
Ta vekk frøa frå chilien, og hakk chili, kvitlauk og ingefær i mindre bitar enn gulrot og lauk.
Samle krydder i ein pose. Du kan bruka chilipulver i staden for fersk chili.
Dette gjer du ute
Varm opp ei gryte på bålet eller primusen. Det er best om panna er litt stor, slik at du har plass til å røra mykje.
Ha godt med olje eller smør i botnen og tilset linser, gulrøter, lauk, kvitlauk, chili, ingefær og heil spisskummen.
Rør heile tida for at det ikkje skal svi seg. Når lauken er vorten blank kan du ha i vatn, salt, pepar, malt spisskummen og meir chili etter ynskje.
Om du ynskjer ein fyldigare suppe, kan du bruke mindre vatn i, eller ha i ein boks med hermetiske hakka tomater.
Kok i 15 minutt til linsene er mjuke, stikk ei skei nedi og kjenn etter. Små linser vert fyrst ferdigkokt.
Vil du spara drivstoff kan du koka suppa i 5 minutt, setja panna til sides for å la linsene svella, så kan du laga forrett i mellomtida.
Kok deretter linsene dei resterande 5 minutta. Økonomisk, miljøvenleg og tidsparande!
Sigrid Henjum er fast turmat-spaltist på utemagasinet.no. Her finn du fleire turmat-oppskrifter.
