Denne salaten fekk eg servert på Aust-Grønland hjå ein inuittfamilie til ovnsbakt aure.
Med ei balje og ei saks hadde mora i huset vore oppi bakken og henta inn tre ingrediensar: Små friske løvetannblad, blad frå engsyre og rosenrot.
Desse blada kutta ho berre opp og blanda saman. Godt og gratis frå naturen.
Løvetann og engsyre finn du over alt. Løvetann inneheld ei rekke vitamin og mineral og har vorte brukt som folkemedisin langt tilbake i tid. Engsyre inneheld mykje C-vitamin og smakar syrleg og godt.
Rosenrot finn du langs fjøresteinane eller på svaberga. Du kan også finna den i hagen til naboen. All rosenrot kan etast, og han finst med raude (ho) eller gule (han) blomster. Finn du nokre som har rosa blomster er det ein tillaga plante. Den er ikkje farleg å eta, men har ikkje dei fantastiske eigenskapane som «ekte» rosenrot har. For rosenrot har vorte brukt både i Noreg, Island og Grønland i lange tider som menneskemat og dyrefor. Rosenrot er Nordens ginseng og viagra og alt på ein gong. Om du googlar rosenrot kan du lesa meir om alle dei gode eigenskapane. Og når det endåtil smakar godt, er det berre å gafla i seg til grillmat, fisk eller berre åleine med ein god dressing på.
For å gjera salaten meir tilpassa vår søte gane kan du til dømes laga ein god honningdressing:
(Men det er det bitre i planta som gjer det sunt, så om du er oppteken av det sunne framfor den søte smaken, kan du ha på dressing på halvparten av salaten og eta delen utan dressing først.)
Honningdressing til salaten:
0,5 dl eplejus
2 ss honning
1 ts god balsamico
sitrondråpar
nykverna pepar
