Å laga brød på tur er ikkje vanskeleg og hevinga gjer seg sjølv undervegs. Ingrediensane held seg lenge, og difor kan du gjerne laga brød sjuande dagen på tur.
Og då er ferskt brød for luksus å rekna!
Dette brødet kan sjølvsagt bakast på andre turar også, men eg garanterar store auge hjå vener og kjende når du tek opp ferdigheva brøddeig frå lasteluka på kajakken, og siklande munnar og rumlande magar når brøda får fin brunfarge i steikepanna.
På kajakktur, og for så vidt på tur med pulk, treng ein ikkje alltid vera lika sparsam med plassen og vekta.
Ikkje vert det mykje ekstra innsats heller, den korte stunda det tek å heva deigen ferdig. Kjelen skal ein stort sett ha med seg likevel.
Oppskrift på gulrotbrød
2 raspa gulrøter
2 koppar grovt mjøl
1 kopp fint mjøl
1 pose turrgjær
Omlag 2 ss sukker,
Omlag 1 ts salt
eit dryss solsikkefrø
eit dryss linfø
omlag 3 dl lunka vatn
Smør eller olje til steiking
Tips
Soltørka tomatar og oliven held seg godt i lukka pose og er supert i brødet.
Krydder som oregano, basilikum og urtesalt gjev spanande smak.
Du kan laga brødblandinga med alt det turre på førehand i ein pose, slik at det berre er å tilsetja lunka vatn i kjelen, røra saman, og vips ferdig!
Vil du ha søte brød brukar du litt meir sukker, og kanskje rosiner og ein dryss kardemomme.
Framgangsmåte
Har du med deg mjøl på tur kan du bruka det til panering av fisk, å laga sausar, og altså ikkje minst til å baka ferskt brød.
I tillegg til mjøl treng du turrgjær, salt, sukker, og om du vil, noko ekstra spanande ingrediensar til brøddeigen.
Det passar perfekt med olivenbrød til pastaretten, solturka tomatar er fint i brødet til suppa, og gulrotbrød er perfekt til formiddagsmaten.
Denne dagen hadde me med brie og heimelaga plommesyltetøy for å ha på ferskt gulrotbrød. Kaffien var og med, og betre kan ein vel ikkje ha det på eit svaberg, med Austdalsbreen som smiler i bakgrunnen, og Styggevatnet som glitrar i soli.
Rett før eg hoppa i kajakken ein nydeleg dag i Jostedalen, laga eg ein brøddeig og sette han i kajakken til heving. Det var ikkje mange plussgradene i lufta, og i alle høve ikkje i det turkisgrøne brevatnet. Det gjer likevel ikkje noko for brøddeigen, for oppe i kajakkluka er det lunt og godt.
Gjærsoppen som har lege i dvale i turka form lenge, skal no få både næring, vatn og oksygen for å laga deigen luftig og fin. Vatnet varma eg opp på primusen i ein passeleg stor kjele. Litt varmare enn fingeren min, for fingrane kan fort vera litt kalde på ein klar vårdag, og turrgjæren tåler litt varmare vatn enn 37 grader.
Oppi vatnet har eg mjøl, turrgjær, sukker, salt, og denne gongen har eg i raspa gulrot.
Eg blandar i hop, og det gjer ingenting om røra er litt laus, den kan godt vera som tjukk graut. Eg har ei god tresleiv eg brukar som rørepinne og seinare til steikespade.
Til kjelen har eg eit fint lok som passar både kjelen og steikepanna eg har med. På med loket på kjelen, og så inn i ein plastpose. Så kler eg på deigen med dunjakka mi, slik at han har det passeleg heitt og held seg i ro om det skulle komma rukker på vatnet.
Brøddeigen kan du heva i ei god padleøkt, men helst ein time og ikkje mykje meir enn 4 timar. Er det kaldt i lufta tek det lenger tid.
Steiking av brød
Når du skal steika brødet er det best med ein gassbrennar, for då kan ein regulera varmen betre.
Har du bensinbrennar går det fint likevel, og du kan byggja musklar med det same ved å løfta panna av innimellom. Smør er bra å ha, både for steikinga og til å ha på den ferske skiva.
Har du investert i ei ny steikepanne er all steiking ei fryd, brøda heng seg ikkje fast, men har du ei velbrukt ei får du berre ha i meir smør.
Eg har i deigen og får plass til to brød, men det kan ein variera alt etter storleiken på panna og kor store brød ein vil ha.
Eg legg dei med litt rom imellom, dei er omlag 2 cm tjukke når eg har dei oppi. Så set eg ned varmen på brennaren og har på lokket.
Etter nokre minuttar lettar eg på brødet for å sjå at undersida byrjar å få ein gyllen farge.
Då er det på tide å lata den andre sida få same farge, og magen kan gjera seg klar. Eg steiker brøda godt for at dei ikkje skal vera rå inni.
Litt god brunfarge på utsida gir ei sprø skorpe, og dessutan har eg høyrt det hjelper på songstemma.
