Eg og søster mi er på sommarferie heime på Sæbø. Skodda heng tungt nedover fjellsidene og syg livskrafta ut av heile bygder, det er heilt umogeleg å planlegge noko som helst.
Men så lettar skodda, det er mogleg å dra på tur. Vi pakkar sekkane, og etter eit stopp på bakeriet på Sæbø og ein liten ferjetur kan eventyret rundt Geithornet begynne.
Med i sekken
• Strikkejakke frå mor. Sjølv lyse sommernetter kan vere kalde.
• Heimelaga jordbærsyltetøy, 2017-årgang. Gramjegeren vil kanskje vurdere plastboks i staden for glas.
• Bomullsjakke. Når du er trygg på vermeldinga. Mykje meir behageleg enn ei skalljakke, og betre for naturen.
• Sovepose av eitt eller anna slag. I dette tilfellet er den klassiske kompakte 3-sesongsposen frå Ajungilak meir enn varm nok.
• Tresleiv. Turkjøkkenet sitt multi-tool. Denne er heimelaga og har fast plass i sekken.
• Liten gassbrennar. Genialt og lett. Berre hugs fyrstikker, for den liksom-geniale sjølvtenningsmekanismen verkar sjeldan.
• Tre telys. Til å lyse opp det raude Hillebergteltet når du skal ta bilete av det om kvelden.
• Raudt Hilleberg-telt. Til å ta bilete av om kvelden, opplyst av tre telys. Og til å sove i.
•Turbolle i tre. Middagen held seg varm lenger og du sparer naturen for eit plastprodukt. Når bollen til slutt har enda livsløpet kan du fyre med den. Denne har eg laga sjølv.
• Oppblåsbart liggeunderlag. Sikrar nattesøvnen på litt humpete underlag. Men ein kjem langt med eit vanleg også.
